早上九點出發,到達機場已經11點,種港島去機場就係咁。用左HK express 網上check in ,去到托運件行李就得,登機時間係12:35,閘口512。 趁有時間,咪咪去左佢個環亞貴賓室大吃大番,我就行左15分鐘去食burgerking 。上機後好平安地訓下覺就到了。 去到福岡機場,一出閘就有免費接駁巴士去地下鉄站。去到地鉄站買左張one day pass,要620yen,可以一天內放題任坐。我地由機場往福岡空港方向,到大濠公園下車,下塌sunline 酒店。 Sunline 酒店就在大濠公園站的五分鐘內腳程,附近還有便利店,裡面都是有熟食可選購的。我們訂了一間大床房,但大床是一張四呎床,剛好平放兩個枕頭,比較細小。洗手間是太空倉feel,有洗patpat 廁所。 放低行李,用返張one day pass 坐地下鐵去博多站,主要係要reserve 遲幾日坐JR的位置,聽說有做reservation 就可以有位坐,坐喺reservation席,如果冇做到呢個動作,就要坐打游擊位(free seat)。喺JR 售票處附近有位職員專責招呼遊客,仲有中英韓文嘅reservation form,不過果張表嘅中文譯本用字同我地傳統中國或香港或台灣有啲唔同,建議睇英文版比較易理解。 完成在博多站的任務後,我地再坐地下鐵到中洲川端站,目標係食總店的一蘭拉麵。我地選擇左面壁思過自修室的卡位,喺二樓買票後,填左自己喜歡的口味,按掣就會有人黎收票,然後一陣就有麵食。我對一蘭就冇乜意見,湯香濃麵爽滑咁囉,點都取代唔到大陸蘭州拉麵架啦。食完都係唔夠飽嘅我地,按左“替玉”即係加底,由790yen,添多130yen的加麵錢。呢種文化都幾得意,同我地食雲吞麵一樣,唔夠飽可以加底。再食完我都係未滿足,去了買蒸蛋糕,真心無特別,87yen一件新屎坑淺嘗。 @@第一個學識的日本文化是:加底 = 替玉 因為拉麵對我呢啲港客黎講真係太細碗,仲得果兩片肉,要加底先夠飽。 食完嘢行左幾間藥妝店,經已八點幾,附近啲店都開始打烊,為左聽日嘅賞櫻活動,我地去parco地庫的超市買左麵包、牛奶同士多啤梨。返到酒店經已十點幾,立即享用左包士多啤梨,堅好味,香甜、無渣、冇乜雜質。 完成第一天的行程,明天希望可以賞櫻,完。
- Aug 23 Wed 2017 19:15
初遊日本 -- 福岡遊 DAY 1 香港到福岡
- Aug 21 Mon 2017 18:43
孩子是為愛情寫句號的人嗎?
今日收到一個壞消息,令我全日都好唔開心。因為我身邊有個親人即將會同佢結左婚八年的老公離婚,原因係佢老公有第三者。
一如以往,出面有第二個女人呢啲橋段,我地實會諗到果個女人一定又後生又靚,或者好溫婉嫻熟 OR 熱情如火。
但係,呢個第三者,竟然係一個自己都有老公有仔的女人。簡單講,都係煮飯婆一個,仲係中女添。
真係情天霹靂﹗我身為一個路人甲,我都覺得呢件事好無稽,其實佢地兩位係咪諗清楚架啦?各有各家庭,有自己的小孩,就算你地幾愛都好啦,呢件事關連左起碼六七個人,即係,要走到離婚呢一步,起碼要考慮埋呢六七個人的感受,生活安排等等。你地係咪傻左?
我覺得自己都係一個好OPEN MIND 的人,我都明白現今世代好難保證一生一世,我亦明白同你結婚生仔果個人未必係你最愛或者最愛你的人,更加知道一個心未必只愛一個人 (如果只愛一個人的話就冇左經典問答:我同你阿媽一齊跌落水,你會救邊個先?呢啲問題)。但係大家既然當初選擇左對方做第三者,亦應該知道遊戲規則,而自己亦都應該跟住個規則黎玩。就算幾愛都好啦,都唔係要玩到妻離子散,除非一開初你地就打算放棄元配,再尋求幸福啦。
如果真係一早打算放棄,而家呢件事跟本冇可能發生。因為呢個男人或呢個女人令到你覺得冇法再同佢生活,你一早就同佢分開,各行各路。所以唔好講話已經無晒感情呢句說話。啲小朋友同個老婆/老公你日日都同佢一齊,如果唔係是旦一方有暴力(包括:精神/身體/言語),基本上冇可能會冇感情。
呢個MOMENT我冇嬲,我只係覺得呢個人好可恥,因為佢地破壞左好多人O既幸福,尤其係兩個家庭的孩子,仲有長輩。當然我知道被離婚果2位都好唔開心,但係我覺更慘的係身邊冇一個人可以幫到手挽回呢件事。我知道感情O既野好難講,你而家話要分開基本上我諗冇人有得反駁,駁左都冇意思。
再退後一步睇,到底咩事令到一對壁人攪到如斯田地?係大人O既錯,定小朋友O既錯?
身邊有幾對原本好美滿的婚姻,以為有小朋友之後會係變成美滿家庭,但係結果都係離婚收場。問題到底出現在邊度?
我SUM UP左幾個朋友的情況,好似好多問題都出現左喺小朋友的身上。普遍都係太太花好多心機時間金錢黎教養小朋友,而且認為丈夫對小朋友管教太鬆散(或者太太本身已DOMINATE左教養模式,丈夫係FOLLOWER),所以唔多唔少會同丈夫出現磨擦。
又有一個情況就係因為啲時間全部都比晒小朋友,跟本冇乜時間維繫愛情,個世界由我俩變左做我們一家人。結果愛人變家人,要愛就外尋。
仲有一個情況係教小朋友令更溫婉嫻熟的太太 或彬彬有禮的先生都變晒型,另一半眼裡見到的只係訓導主任,簡單講,見到你都唔老泥。
呢過我呢幾位離婚朋友仲有一個共通點,就係同長輩同住或由長輩照顧小朋友。我都諗緊會唔會因為長輩的嘮叨都會令一段美好婚姻變得淡而無味。
今日喺度諗諗下,我都不禁落淚,我嘆息一個美滿家庭即將消失,亦唔知我呢位親人應該點算。
佢打算帶埋2個小朋友離開呢個家,佢自己話租屋住?租?點租,2房單位要萬五六蚊,仲有啲雜費,小朋友的學費生活費,得果2,3 萬蚊人士,點捱得住?
返外家住?公屋有幾大?三口子加埋2個長輩,住4百呎,訓碌架床,3個人一間房?
諗到呢度我真係哭左出黎,大人就話可以屈就,小朋友住村屋大地方,點適應到豆膶咁細。
我真心希望呢個故事會有一個好的結局,亦希望我呢位親人有順心的新生活。
- Aug 19 Sat 2017 15:45
再食高鐵餐﹗
- Aug 15 Tue 2017 21:00
25屆荷花bb展 - 孕媽媽攻略 2
我係8月6日去第二次bb展的。
因為之前8月5日玩得太high,晚上約十點決定明天再去一次。我上網買左2張門票,轉售價係30元兩張,果位賣家好好,晨早九點幾就同我交收,後來先知係講座後贈券。
我大約十點再入場,星期日的早上唔係太多人,可能要黎的昨日都黎左了。(今日我有備而戰,昨日我只帶左四包餅,結果喺會場食漢煲包。今日我就買左豬柳蛋漢堡,朝早仲食左個麵先出發,夠晒飽﹗)
到達會場後,雖然只係十點零七分,不過我知道25蚊的筍貨係買唔到的了。我把握時間去到li l goat 換手工皂,因為我對羊奶皂好有興趣,所以我第一時間就去睇左呢攤位先。當然,仲試左佢其他產品,最後買左2支羊奶潤膚霜同2盒尿布疹膏,兩樣都啱大人小孩用,盛惠$200。
另外就買詩思樂乾棉同濕棉,分別平均$22.7 / 包、$75/ 120片,包送貨到宅。
仲有pigeon 濕紙巾 $120/12包。
仲有食物剪 $10、bb牙刷$15 和 $29、紙包飲品盒$14、香蕉牙刷$32、牙膠奶咀$29/2個
至於下面呢兩張相,係我最精選今次bb展的禮物,all of them are free!!!!!!
左上 dha 魚油丸 30粒裝、右上雪印送bb車涼蓆
左下skip hop水樽、右下babo botanicals body wash / 防晒 ,巴哈急救靈
左上li l goat 羊奶皂、右上洗奶瓶刷
下 各款濕乾紙巾 (右下角果包好似紙巾的東西,打開係乾棉黎,好便攜)
買完晒嘢已經大約3點半,諗住報美贊臣個講座,要到5點半果場先有位,都好,可以休息一下。去左詢問處打左個印,一陣可以再進場。
聽完講座真係獲益良多,原來咁hard sell 臍帶血真係只係有錢人的玩意,又一次證明有錢有病醫。因為醫生講者話,而家紅十字會都有臍帶血庫,按指示先會比病人用。大部分的政府醫院係唔會用臍帶血黎救人,亦即係話,而家大家買果個兩萬蚊package 儲臍帶血,touck wood 唔好彩要用到的話,你只可以搵一間願意幫你用臍帶血的私立醫院,而家要果間醫院的醫生信任由你提供的臍帶血先得。又即係話,政府醫院唔會幫你用你留起o既臍帶血黎救你的家人。所以結論係,留黎用唔到,連保障都冇,所以呢筆錢慳返。
講座後拿的的東西更是精彩,首先有一個哺乳枕,好開心,我真係好需要呢樣嘢,其他就係唔同類型的sample。
仲有的係有2張門票送返比你,等你可以入場繼續行。
完場時大約七點,我入返場(蓋了印可以再進場),在hea著看coupon book ,有位女士問我係咪排緊隊。原來我行左喺田園香個booth的位置。我問果位女士呢度有咩嘢排,佢話排個手搖鈴玩具和肚圍。原來係咁,我又排埋一份,一陣就換到了。
最後,真係最後,行多一個圈就離開了。
後記:
今日第二次去,感覺輕鬆左,一來人少啲,二來有啲目標都好清晰。例如我放棄左唔買一個蒸奶樽煲、唔join 臍帶血package、買左需要的物品等等。當然有啲仲好心動好想買,例如訂同珍豬腳薑、訂滴雞精等等。不過呢啲都急唔黎。
另外,其實場內都有好多大陸同胞或者係台胞的人士,可能佢地都係懷住為bb添置東西的心情,所以大家都比較有秩序同有禮貌。當然,呢兩日無論邊個都好似水貨客咁樣,一車一車咁車啲嘢走,亦有蹲喺度執行李的情況,甚至坐地上。但係真係冇旅遊區果種自由行情況。大部分人都係好有秩序咁排隊,甚至乎有啲冇香港聯絡電話的同胞排到佢冇得玩,都冇乜發脾氣的情況,亦完全冇爭先恐後的問題,所以會場都係玩得開心的。
此外,我強烈地覺得如果你老公或陪人,係一個超級唔慳家或唔志在錢的人,甚或討厭排隊的話,不如自己一個人去好過了,因為睇佢地啲面口都幾難睇。我在會場都會見到有啲陪人尤其長輩會喺到抱怨「排咁耐」、「有冇咁誇張呀」、「啲禮物有寶咩」的聲音。如果你身為一個好想繼續等的人,真係會好無引。鬼唔知排隊好累好花時間咩,但係我參與呀嗎﹗仲有的係,如果你咁啱遇到朋友,又或者約朋友一起去,如果大家的小孩年紀不同,就不必要一起行,因為大家的需要不同,結果會花多一倍時間黎陪她買東西,她又花一倍時間陪你買,這樣係唔划算的﹗
最後的最後:
最後我咪講座拎到2張門票的,我放左上網賣。我以20蚊2張賣出,未到十時半,就有人表示想買了,翌日早上我便和她交收,希望她也玩得好開心。 結果,我第二日入場的門票實際支出只係10蚊2張,令我覺得自己好幸運,亦好回本。
- Aug 09 Wed 2017 21:07
孕中後期貧血問題 2
- Aug 08 Tue 2017 21:54
25屆荷花bb展 - 孕媽媽攻略 1
身為孕媽媽,如果打算去bb展大肆購物或玩,首要條件係要夠壯健同埋有人陪。因為一個人去實在太危險,場內咁多人,萬一唔舒服或者比人撞親都唔好啦﹗
今年的bb展喺2017年8月4日至7日舉行,地點一如以往係灣仔會展,住喺柴灣的我,覺得自己享有左地點的便利,結果,一去就去左兩日。
我本身係一個都幾唔鍾意迫的人,不過每年書展我都會去,因為可以買到自己鍾意o既書,或者買到一啲一直好想買又冇減價的書。
今年終於要做媽媽,所以都去bb 展見識下。
抱住見識下的心情,我去到竟然有意想不到的驚喜,而且滿載而歸,以下係我呢兩日所有的戰利品。
{我覺得自己都好厲害,可以拎到咁多嘢,呢度只有不多於4份1係自費購買,其他都係贈品}
因為咁好戰績,所以我決定要寫一篇bb展孕媽媽攻略。
我係8月5日去bb展的,門票係由oxford path 玩facebook 遊戲換返來的,有兩張,和大大一齊去。以下係我今次攻略的要點:
事前準備 -
- 事前報講座,抽獎,期望拿到免費門票 - 報名媽媽會的講座,完場可能會派發門票 - 雖然會展場內有野食,但係冇位坐,孕媽媽中場外出午飯或休息要去詢問處蓋印,可再進場 - 必須買Coupon book,裡面會有好多購物優惠券、遊戲券、試用品換領券 - Print 定兩款個人資料label,一款係只有英文名,電郵,電話;另一款用全名,地址,電郵,電話。第一款係比啲你唔想佢會聯絡你,但係又好想換佢份贈品嘅公司,例如幼 稚園,保險公司;另一款係一啲你真係對佢啲product 感興趣嘅公司,例如尿片商,奶粉商或同你個人喜好有關的公司。 - 手機要帶尿袋/充電器,因為啲攤位會叫你係咁like facebook,會用好多電。 - 如果唔怕樣衰,拎架有座位嘅買餸車去,一來可以拎禮品,二來排隊太累可坐下。 - 要拎一個行李箱,因為啲禮品有大有細,零零碎碎,雖則有好多特大環保袋比你,但都好重、好容易撞到啲孕媽媽。 - 要帶定懷孕證明,尤其喺頭五個月,因為唔見肚,啲攤位職員辨識唔係你係咪孕媽媽,有證明方便職員check 。(真係有啲媽媽唔知渾水摸魚定係真係冇帶證明又唔顯肚,結果參加唔到一啲攤位活動而發脾氣或口角,無謂啦﹗) 場內攻略 - - 入到場要花些少時間睇一睇個Coupon book ,睇下邊啲禮品自己想要,然後就排果份禮品。首先係排左大公司先,例如今次我最想要雪印送嘅bb 車蓆。最好你有兩個人,放低老公喺度排隊,然後再去一啲細公司嘅攤位換啲有限量又有價值嘅禮品。今次我就喺佢排緊隊果一個鐘入面,拎埋佢本coupon book 換左手工皂、welenda 尿疹膏sample。換到咁上下時間就返去雪印玩遊戲,好省時間。 - 續上項,到老公排到咁上下,你去replace佢玩遊戲(都玩十至十五分鐘),佢就可以拎住兩本coupon book 去換禮物,又拎左一堆口水肩、紗巾等。 - 有部分攤位要攞籌再在指定時間換禮品,又有啲預先登記,所以要睇睇個coupon book,如果唔到你行到去冇得換又浪費左時間。 - 如遇攤位截龍,先詢問有冇拿籌的制度,詢問重新排隊的時間,和按現場等候人數而留下一人等候,待開隊時立即排隊。而另一人當然繼續會場博殺。 - 在排隊時才整理袋子,每個攤位拿一下東西,便會有很多袋子,但如果停下來整理真的頗浪費時間,所以在長龍時整理最好,再順道看看單張,不用的就還給攤位或環保回收。(今次我地向攤位退回左兩罐君樂寶奶粉,因為我地未有打算比bb飲奶粉,拎住太重,所以就退回攤位) - 換禮品要精明,有啲攤位會送啲好求其的禮品,例如原子筆,1ml 潤膚膏sample ,迷你相架果啲,呢啲就唔好浪費時間或浪費你嘅個人資料,索性唔好換。要換就換啲有價值同用得著嘅嘢,例如嬰兒用品,媽媽用品,品牌起碼有一次用量嘅sample 等。當然,最好就好似啲大品牌奶粉商送出保溫杯,涼蓆,dha 丸,包被等等。 - 買嘢要貨比三家,有時bb 展有好多嘢特價,但係例如乾濕棉、濕紙巾等,喺bb 展未必最平,最多只可能係包送貨或者平均平幾毫至一幾蚊,咁又何必一次過買幾箱喺屋企呢。 - 熱情Exchange。 有時我地會拿到一啲禮品可能未必需要,或者果張coupon 你用唔著,可以嘗試同附近啲媽媽交換或贈送,咁樣就可以各取所需。例如你兩人去玩攤位,換了兩張一模一樣的吹氣沙發,別人同樣換了兩個同款的水壺,剛好大家交換一下,就可以有兩款了。在會場我就遇到一位趕著離場的媽媽,她將自己的coupon都給我了,我又換到更多禮品。又譬如有一位同胞問我在哪可以拿到特大環保袋,我二話不說給她一個,因為自己也已經有五六個了,分享也很好。
後記:
- bb展要去玩兩日,除左貪心貪玩之,第一日去換禮物,本coupon book 有成四百頁,當你換四分一,都要換一百次。然後仲有啲攤位要排隊,所以第一日只可以做呢啲。第二日就係要換返或再換多次自己要o既嘢,同埋認真睇下有冇嘢要買,同埋認識下新product。
- 我今次遇到的問題就係有啲嘢唔知買唔買到,例如高溫消毒煲、參加臍帶血庫等等,都係好重要驅使我去多一次。其次就係我真好想聽美贊臣果個媽媽講座,題目就係關於基因test 、臍帶血、敏感,仲有果個我好想要o既哺乳枕,所以我決定再去一次。
- Aug 08 Tue 2017 21:53
新手媽媽好幫手 - FISHER PRICE高溫消毒煲 (二手)
首先,我都知道唔係人人都接受用二手貨。有啲人話尤其BB用啲嘢,一定要最好。
不過,老實講,BB用品有好多時都係好似扑傻瓜咁,你乜都買黎比BB試,睇下BB鐘意邊樣。又或者你咩類型都買,睇下邊樣先係啱自己用。
高溫消毒煲係我考慮左好耐先買,首先,古時阿媽都係用水烚啲奶樽,完全有電子嘢用,當然係非常辛苦,但係又未至於辛苦死人,所以我當初都係諗住烚奶樽就算。
後來諗諗下,屋企咁鬼多蟑螂,我烚完都唔知放邊好,所以就買左個電子乾碗機,都係二手的,$80蚊,原先的主人因為覺得佢太細而出讓,真係有九成新。
我試左乾碗同用UV消毒,覺得都唔錯,打算之後烚完奶樽就放入去吹乾消毒。
經過左BB展後,有好多朋友都話其實烚奶樽個煲要全新,過程亦要有人睇住火,小心痴住個煲底,一個不留神,連煲連奶樽痴埋一起,咁就係咁先。
而且加上我覺得第時放工反黎煮飯,仲要煮埋幾個奶樽,真係好難攪喎,所以的起心肝再睇高溫消毒煲。
而家市面上已經有幾合一的煲,即係集暖奶、消毒、烘乾、收納於一身的消毒煲,而幾合一的價錢比分開買更平,基本上係新手必買PRODUCT。不過我已經有個消毒碗櫃,亦有暖奶器,實在唔需要幾合一。另外,我相信幾合一的東西係唔會比分開的好,以往經驗係二合一洗髮水用完都係要用護髮素;燒烤微波爐的烤焗功能亦唔及焗爐好,所以都係分開較好。
為左唔想太花費金錢,又美其名環保,所以我決定仔細睇二手市場。
奶煲黎講,最多人揀都係NUK、TT、AVENT呢三幾個牌子,尤其TT、AVENT以大同冇多餘間格而得到好多媽媽垂青,當然,二手市場就好多人出售呢三個牌子,仲有其他名氣冇咁大但又好實用的都有,二手價錢大約$50至$800不等。而我就揀左FISHER PRICE
介紹返個FISHER PRICE 高溫消毒煲
FISHER PRICE係一個細細個就識的牌子,因為佢啲玩具真係賣到成行成市,而奶煲呢樣嘢,我諗佢唔係最專。
今次揀佢的原因有以下幾個
1. 我自己本身對FISHER PRICE呢個BRAND情有獨鍾,因為我曾經喺玩具反斗城打工,負責BB用品,所以同FISHER PRICE好有感情。
2. 佢原本的主人用左廿次都冇,個煲好新淨,冇發黃,原裝配件、說明書、盒子都齊晒。
3. 二手價$100,同類型二手貨唔算貴,就算真係唔好用,要黎蒸下手巾都可以。
4. 其實呢個最重要,呢個煲好夠大,一次可以蒸7個奶樽,上層可以蒸奶咀和配件,全程九分鐘攪掂,快捷。另外內籠都係冇多餘間格,第時啲碗仔餐具都可以放落去蒸杲
5. 佢原本的主人住喺我對面個屋苑,行過去交收唔洗5分鐘。
結果,我就係買左佢返黎。
今日我試左機黎,我之前飲住滴雞精啲玻璃樽仔放入去蒸,過程好快,好利落,落水開機,完全關機,得左,真係冇挑剔。
PS:我買呢個煲前,同時見到幾個都好心儀的二手貨,都係覺得呢個比較好。同賣家約交收,初時佢好積極,日子都約左,但係差在未CONFIRM時間。突然距離交收兩三日,佢消失左,留言幾次比佢都冇回覆,我仲好擔心佢唔賣比我。因為剛好係BB展,如果佢又唔賣,我又睇唔啱第二個二手貨,我就要趁BB展買減價貨。忐忑左好耐,去到星期日,我忍唔住,拎左個靈擺黎問,到底果位賣家會唔會賣比我,結果靈擺話會,所以星期日我去BB展睇完一輪都冇落注,我心諗,如果靈擺唔準,我唯有星期一BB展LAST DAY再入場買個煲。結果,賣家星期日晚好夜終於覆左我,佢冇留意留言,佢以為約實左我星期一了,不過佢忘記左未約我時間。好在,最後都交收成功﹗真係要感謝個靈擺比左一個答案我﹗等我唔好咁慌,冷靜啲唔好胡亂消費﹗
- Aug 03 Thu 2017 19:30
仲有兩個半月,要準備走佬袋啦!CHECKLIST
- Aug 01 Tue 2017 21:43
孕中期的貧血問題
上兩周看醫生的時候說起頭暈頭痛的問題,還擔心會不會是妊娠糖尿病或毒血症的問題,所以醫生幫我抽了血化驗和做心電圖。
翌日診所護士留言給我,叫我明天回去,因為醫生要儘快見我。
嚇得我半死,以為自己發生什麼問題,又擔心會不會有妊娠期的疾病,擔心了一整天。
到達診所,遲到了一些,但還是被安排為第一個籌號的病人,令我更加擔心。
見到醫生,醫生說原來我是貧血,她說3月份在醫院的驗血其實已是邊緣人士,但剛剛這次更是新低。所以醫生說:
你要食鐵丸﹗
鐵丸,係一種冇媽媽想食補充品,因為食鐵丸最大的問題係便秘,便秘除左痾唔到,夾硬痾只會生痔瘡,所以真冇人願意食。
但係,唔夠血又點算好呢?立即又上網又睇書,睇下點樣補鐵。
原來食物的鐵質都有分血紅鐵和非血紅鐵,簡單講
血紅鐵係黎自動物內臟、肉類、海產的鐵;
非血紅鐵係黎自蔬果類的鐵。
而人體最易吸收的係血紅鐵。
睇完一大堆資料,發現我地成日話食多啲菠菜可以補鐵,但係呢啲鐵人體相對冇咁易吸收;又成日話食返多啲牛肉,但係牛肉原來含鐵又唔係最高。
鮮為人知的,竟然係要食 蜆 蜆 蜆 蜆 蜆﹗(每百克3.8mg). 食蜆最好係罐頭果種,係最鐵o既食物黎﹗(每百克高達37.8mg)
真係令人驚喜,其次就係豬肝等內臟。(每百克平均2.x mg)
問題又來了,罐頭蜆到底邊度先有得賣?唔知囉﹗
為左血紅鐵,我決定去超市睇下。
去左百佳同惠康,大家不約而同地都只有泛亞牌煙燻蜆肉,已無其他選擇。
買罐返黎試下先,一罐扣除啲汁唔知有冇100克,不過都冇所謂,因為我本身都唔食內臟,牛肉又少食,所以選擇唔多,就食啲蜆啦!
除左蜆之外,我仲食左排行榜上都幾高位置嘅沙甸魚(每百克約2.4mg)同黑芝麻 (每百克24.5mg) 。
沙甸魚都係果幾個品牌,只係選下唔同口味令自己冇咁悶,而芝麻糊我就揀左由細食到大嘅多多,我自己仲加左馬玉山黑豆粉,夠補血啦掛。
今日睇資料,原來紫菜都好勁鐵,每百克有成90mg,呢個抵食啊,再食啲紫菜先!
越接近懷孕後期越係緊張,因為身體需要嘅鐵質由初期嘅每天8mg 上升至中期21mg,食得多又唔知吸收到幾多。
黎緊九月又去覆診睇貧血,希望會有好轉啦!
- Jul 27 Thu 2017 19:48
美素佳兒會員 — 營孕好easy 遊戲禮品