ChickenTailBun 發表在 痞客邦 留言(0) 人氣()
原定去大濠公園賞櫻,去到公園門口只可觀雨,都係返去先啦。
我地食左啲野餐麵包同牛奶,然後徒步行去天神。中途左hea 又hea,hea到去長濱鮮魚市場。魚市場有一座商用樓宇,樓下有堆餐廳,我地就走左入一間(唔知咩名)度,因為真係好多打工仔幫襯,唔好執輸。
入到去原來佢冇中英文Menu,當我地好努力咁Google translate時,隔離位兩位中年香港夫婦終於出聲。佢地話有張英文翻譯可以比食客自行翻譯。不過我地聽完佢地分享之後,決定跟佢地食。我地點左1620yen 嘅刺身飯定食同埋870yen天婦羅定食,而好出名嘅新鮮煮鯛魚我地就冇食嚕,因為我地唔識吐魚骨。刺身飯有嘅刺身包括三文魚兩件、吞拿魚兩件、熟蝦一隻、鯛魚兩件、魷魚一件和埋一片海膽,人生第一次食咁好食最新鮮嘅刺身飯,真係好驚喜。另外天婦羅就有兩件炸、兩件炸蝦、一件尖椒、一件茄子同埋一件蕃薯。魚天婦羅從未食過,好鮮味,係油性魚黎,但唔肯定係咩魚,而隻蝦係新鮮蝦黎,唔係食日本放題果啲急凍蝦,真係好吃到流淚。呢度餸嘅份量ok,但係如果多啲飯就更飽啦,但味道一流。
呢個天婦羅啲魚同蝦係有鮮味架﹗唔係我地平時放果啲急凍蝦﹗
大大話剩係食呢粒海膽都值回票價
食完午餐大約1:30, 我地冒雨步行去天神駅,目標係去天神地下街同一帶嘅商場。距離aeon 仲有一條馬路之隔,我地比一間好西洋嘅麵包店吸引左,重點係間店好靚,仲有款麵包都可以試食,我地衝左入去食包。呢度啲大舊麵包大約四十蚊港幣左右啦,我地最後揀左袋朱古力合桃脆包,盛惠500yen。一路行一路食,我地就咁就行左aeon 同相連嘅兩個商場,仲喺超市買左啲熟食做晚餐。食飽後方發現未去天神地下街,所以又急急忙忙走去。
天神地下街係一個賣潮流服飾嘅地方,一件衫大約3000yen左右,但我地到達嘅時間太晏了,大部分店都關門了。地下街有一間芝士撻店,即係我地sogo排長龍果間,一個撻216yen,平香港幾蚊架,即食。食到滯埋之後,我地再去唯一仲未關門parco 商場下嘅餐廳睇下有咩食。呢度係潮食集中地,而家價錢豐儉尤人,所以一定搵到啱心水嘅嘢食。睇完一輪,我地都攰了,所以打道回府,晚安。
ChickenTailBun 發表在 痞客邦 留言(0) 人氣()
早上九點出發,到達機場已經11點,種港島去機場就係咁。用左HK express 網上check in ,去到托運件行李就得,登機時間係12:35,閘口512。
趁有時間,咪咪去左佢個環亞貴賓室大吃大番,我就行左15分鐘去食burgerking 。上機後好平安地訓下覺就到了。
去到福岡機場,一出閘就有免費接駁巴士去地下鉄站。去到地鉄站買左張one day pass,要620yen,可以一天內放題任坐。我地由機場往福岡空港方向,到大濠公園下車,下塌sunline 酒店。
Sunline 酒店就在大濠公園站的五分鐘內腳程,附近還有便利店,裡面都是有熟食可選購的。我們訂了一間大床房,但大床是一張四呎床,剛好平放兩個枕頭,比較細小。洗手間是太空倉feel,有洗patpat 廁所。
放低行李,用返張one day pass 坐地下鐵去博多站,主要係要reserve 遲幾日坐JR的位置,聽說有做reservation 就可以有位坐,坐喺reservation席,如果冇做到呢個動作,就要坐打游擊位(free seat)。喺JR 售票處附近有位職員專責招呼遊客,仲有中英韓文嘅reservation form,不過果張表嘅中文譯本用字同我地傳統中國或香港或台灣有啲唔同,建議睇英文版比較易理解。
完成在博多站的任務後,我地再坐地下鐵到中洲川端站,目標係食總店的一蘭拉麵。我地選擇左面壁思過自修室的卡位,喺二樓買票後,填左自己喜歡的口味,按掣就會有人黎收票,然後一陣就有麵食。我對一蘭就冇乜意見,湯香濃麵爽滑咁囉,點都取代唔到大陸蘭州拉麵架啦。食完都係唔夠飽嘅我地,按左“替玉”即係加底,由790yen,添多130yen的加麵錢。呢種文化都幾得意,同我地食雲吞麵一樣,唔夠飽可以加底。再食完我都係未滿足,去了買蒸蛋糕,真心無特別,87yen一件新屎坑淺嘗。
@@第一個學識的日本文化是:加底 = 替玉
因為拉麵對我呢啲港客黎講真係太細碗,仲得果兩片肉,要加底先夠飽。
食完嘢行左幾間藥妝店,經已八點幾,附近啲店都開始打烊,為左聽日嘅賞櫻活動,我地去parco地庫的超市買左麵包、牛奶同士多啤梨。返到酒店經已十點幾,立即享用左包士多啤梨,堅好味,香甜、無渣、冇乜雜質。
完成第一天的行程,明天希望可以賞櫻,完。
ChickenTailBun 發表在 痞客邦 留言(0) 人氣()