ChickenTailBun 雞尾包

其實以上各樣大部分都係我日常生活用品，真正產婦需要用的東西係以下呢幾樣嘢。包括：

1. 產婦衛生巾(有扣) 至少要帶兩包，一包必須有扣，因為喺產房可能已經唔著內褲，方便助產士、醫生、護士隨時檢查進度

2. 床墊 - 至少十片，要黎墊住羊水、血等等

3. 網褲 - 產前產後要黎HOLD住條M巾，至少有四條，因為除左惡露之外，可能會尿失禁，備多幾條穩陣啲。千祈不要在醫院洗網褲，好缺德和樣衰

4. 沖洗瓶- 姑娘見到會話用呢個唔足夠沖洗惡露，佢會要求、提議你開花灑沖洗陰部，不過下下淋濕個身都幾煩，同埋會好累，好想去完洗手間就再訓過，所以帶個沖洗瓶沖下都好。

介紹返：呢個係我精心挑選o既沖洗瓶，通常大家會買果款類似甜醬樽果個牌子x 儷，但係我幻想不到點樣可以由下而上咁噴個傷口。而我揀嘅呢款原本係用黎淋花，用呢個返而可以由下而上咁沖洗。價值$12

 第二樣係床墊，喺教協買，十片都係$26.5，非常經濟。

第三樣就係網褲，呢個擺明玩嘢，我上網買的，$4一件，但係佢造工真係非常粗糙，我以為賣家寄左塊破布比我，試穿過，我對肥肶位置橡筋位都幾緊，但係因為緊，佢應該可以碼住條衛生巾唔好走黎走去。另外，我後來再買多左一PACK OIO的網褲，因為突然覺得如果三日兩夜的日子整污糟左網褲，冇理由喺病房洗血褲咁肉酸，更加唔可以指望老公會咁叻走去幫你買幾條網褲反黎。希望留醫院果三日兩夜黎招呼護士的要求。

另外仲有最重要的產婦衛生巾就無需要Show 出來，因為超市只有一個品牌高潔x $24.9一包，人人都知的了。

我咁買法都用左約$100，實際唔算平好多，只係可以揀到自己用開衛生巾果個牌子，同埋自己選沖洗瓶。

仲有其他產婦需要用的東西仲有：

廚房紙巾 - 爬文睇返黎，因為廚房紙巾比較柔軔，用黎抹下體比較吸水和不易穿破，對個傷口好啲。(後記：呢個真係超級有用，我到而家處理惡露都仲用緊，抹落去夠輕柔、又唔穿、又易吸水，真係超掂，不過各位東區醫院的媽媽，千萬不要丟去廁所沖，沖唔走，掉垃圾筒)

濕紙巾 - BB和媽媽都用得著，BB要抹屁屁、媽媽要抹走乳房上的汗水，等BB唔好食埋啲汗水同老泥

火酒 - 餵奶前抹下個乳房，乾淨啲好

收腹帶 - 為著美麗的身型和減少子宮復位的痛楚，要帶埋去紮肚

毛巾 - 萬一真係忍唔住要沖涼洗頭，又或者入院第一時間未生得都要沖涼時用 (後記：醫院要求產婦用花灑沖洗陰部，所以要有毛巾抹乾返下肢)

奶泵 - 爬文睇返黎，我覺得可帶可唔帶，我會帶SILCONE BREAST PUMP，因為第一、二日我地未識得點教BB啜奶，可以試泵奶。

咁樣執執埋埋都一大袋，誇左啲，最後我自己日常用品好多都冇用到，主要因為真係太累了，同埋要不停照顧BB，唔得閒打理自己了﹗

另外有啲物資要加碼，包括床墊，果十片BB未出世已經用左八片，所以要再買黎；產婦衛生巾，一共用左三包，網褲用左3條；廁房紙巾，用左1卷；仲有大保溫壺，東區醫院唔會為產婦提供滾水，只有偏熱的溫水和冷水瓶，如果要沖炒米茶和飲熱水，請自備保溫瓶，可以朝早請姐姐入一瓶熱水，下午請家人去CANTEEN 入一瓶滾水，咁就夠一日飲了。

仲有大家可以考慮拎埋充電尿袋，因為醫院見到病人用插頭會阻止，有個尿袋就唔怕手機無電。

暫時係咁多先。

今日唔知發生咩事，十點去到全院滿座，想搵個位坐下都冇。

母乳保溫袋功能測試

件事係咁的。

因為公司個雪櫃由開幕到而家15年都冇換過，而家下格已經係去到十五度咁上下的溫度，加上我地六十幾個同事日日又開又關，個雪櫃比起開冷氣更熱，即係同冇冇分別。

而家倘算可以運作到的係冰箱部分，而且都係放滿立立雜雜的東西，食得唔食得都有，所以我決定要自備保溫袋/保溫箱黎貯放我將來的母乳。

所謂香港地少人多，我個位都只係得一個位咁大把，放個大約10L 左右的保溫箱都好迫了，加上保溫箱比較大，最後朋友比左一個大約15L左右的保溫袋我，我就試一試喺呢個炎熱的夏季可以捱唔捱到放工。

材料：保溫袋、冰種350ML 3個、3個奶樽的水

方法：中午12時，一個已結冰冰種打橫墊底、兩個ZIP喺奶樽旁

溫度

晚上九時打開，量奶樽水溫，最底部3.4度、中部6.3度，搖晃後平均7-9度。

袋內空氣16.9度

隔左5分鐘，奶樽水迅速升到10-15度。

溫

第二日再試，情況類似，我再模擬由袋中拿出來，換另一個保溫袋(平時買雪糕果種冰袋)，再加輕便12蚊店啫喱冰包，隔左3小時，仲KEEP到12-16度。

今次實驗係成功O既，其實唔應該打開換袋，但係個15L保溫袋背住回家唔多方便，因為放工已有個手袋，仲要帶揹帶咩BB回家，仲有個保溫袋，仲要去買餸，咁樣真係好輪盡好唔方便。

所以要換個輕便袋，而家發現是成功的，咁就可以安心用了。

自制的dry shampoo

話說人人都話生左Bb 之後唔可以洗頭沖涼，不過我習慣左每日洗頭，唔洗個頭真係又油又臭又生頭皮。

前幾年個頭做左個小手術，因為縫左八針，所以成個星期都唔可以洗頭。當時買左babybliss 的乾洗噴霧，用左兩次已經冇用了。主要棄用的原因是太化學同埋用完頭髮容易打結。

今次又黎一獲冇得洗頭，諗起都頭痕，上網搵左好多資料，最後整左呢個dry shampoo。

主要成分係葛粉。原來香港想買到葛粉都幾困難，連烘焙店都未必有，最後都係去外國網站買。其餘材料有朱古力粉用黎調色，梳打粉除味。

Mix 好之後用手指撒落頭髮或用碎粉掃掃上髮根，等一陣就再梳走啲粉末。

我喺一個夜歸又炎熱嘅晚上試用左，幾掂。頭髮上嘅汗一掃而空，頭油就要等3至5分鐘吸附。

我會喺產後用，因為會自己照顧bb ，用左可以清理一啲頭髮上的污糟同塵，加上用啲材料都係食用材料，bb 掂到食到都唔怕有害。

終於有機會學人寫下空瓶記，今日嘅主角係bio oil 百洛油。

近來多左同一啲已經有小bb的朋友聚會，主要因為要交收啲bb用品。

大家講黎講去又係講緊坐月的問題，大部分都會問「你阿媽黎唔黎同你坐月？」「你奶奶黎唔黎同你坐月？」「你有冇請陪月呀？」。

聽呢個問題聽到我都煩晒，我解釋左無數咁多次，我真係覺得有個人喺度，我仲覺得煩。

大家會講：

- 你自己攪唔掂架﹗

- 你會好攰好虛弱，你做唔到咁多架﹗

- 咁你都要食嘢、阿b都要餵奶換片

下刪一千一百萬字。。。

但係，其實，我都唔知係我怪異，定係會有其他媽媽都會好似我咁，唔喜歡屋企有其他人。

可能性格問題，或者我真係獨家村，我真心唔接受有其他人喺我屋企，尤其果個係女人，或者係長輩。

之後就會有人話，咁請個陪月啦，受薪，冇咁多聲氣，你可以叫佢做嘢。

但係，有一個陌生人，喺你屋企裡面，攪你個b、攪你餐飯、攪晒你全屋的水電煤，乜你覺得仲可以休息嗎？

有個朋友上黎坐，你都招呼佢飲杯水。有個朋友喺你屋企，都會拎你屋企啲小搬設黎睇下啦。

何況係個陪月阿姑？﹗佢總會打開你個廚櫃拎你啲餐具廚具黎用，因為佢真係要煮野。

佢會開大你個水喉洗野，因為佢真係要洗野。

佢會開大個火煲嘢，因為佢真係要煲嘢。

佢會去街市同你買貴餸，因為你真係要食好野。

雖然佢一切都為你好，但係呢種行徑係我最害怕，因為呢啲都唔係我一貫的生活習慣。當有一個人可能會咁做，我諗到都覺得restless，何況仲話可以休息訓下。

如果一個唔好彩，請左個嘮嘮叨叨的阿姑黎做陪月，黎到話你呢度唔啱果度唔得，我真係多得你唔少。

一諗到有人喺到吟吟尋尋，我覺得我精神疲勞比起身體的疲勞更大，

而且，呢位陪月員仲係受薪，即係貼錢買難受，

點解仲要我咁做喎﹗

認真玩嘢﹗

話說啲BB喺初期大得好迅速，咁慳儉的我，當然喺朋友群中收集BB衣服，都收集到二、三十件，又衫又褲又毛巾又被仔，全部都細細件，所以我一口氣掉晒去洗衣機洗左佢。

之前得意洋洋地買左十隻衣架比BB，以為少少地用住先，點知，真係太少。

我唯有用埋我地啲大人衣架，一個衣架掠兩件，再用晒全屋所有衣夾，同啲BB褲浪果啲小啪鈕，好似倒掛金鈎咁掛住啲BB衫。

睇到都覺得自己神乎其技，不論空間使用或是物資使用都一流﹗

BY THE WAY，BB 啲衫仔真係好難摺，呢埋衫乾左之後，我點樣都摺唔靚佢，尤其係每個牌子啲SIZE都不同，有啲係0-3M、有啲0-6M，有啲因為朋友比，混合晒咩SIZE都有，又有啲已經CUT左牌，攪左半個鐘都攪唔掂。真係頭痕。

近呢幾日都好頭暈，唔知天氣熱定係我又唔夠血。

唔理咁多都係又狂食高鐵餐。

今日打開左罐頭蜆，它有38mg的鐵，真係無與倫比，而佢o既味道就係一般罐頭魚的味道。

味道算係ok 的，因為午餐唔想諗，直接用方包黎夾就算，同場加食一碗芝麻糊，夠高鐵啦掛﹗

不過又當然，食完都仲係暈，因為今早有個大活動，義工黎一齊整cheese cake，企左四個小時真係好辛苦。

之後仲要處理整cheese cake 用過的容器，真係好累了。

而家坐下抖下，同食高鐵餐再加blackmores，希望一陣會好啲。

我係8月6日去第二次bb展的。

因為之前8月5日玩得太high，晚上約十點決定明天再去一次。我上網買左2張門票，轉售價係30元兩張，果位賣家好好，晨早九點幾就同我交收，後來先知係講座後贈券。

我大約十點再入場，星期日的早上唔係太多人，可能要黎的昨日都黎左了。(今日我有備而戰，昨日我只帶左四包餅，結果喺會場食漢煲包。今日我就買左豬柳蛋漢堡，朝早仲食左個麵先出發，夠晒飽﹗)

到達會場後，雖然只係十點零七分，不過我知道25蚊的筍貨係買唔到的了。我把握時間去到li l goat 換手工皂，因為我對羊奶皂好有興趣，所以我第一時間就去睇左呢攤位先。當然，仲試左佢其他產品，最後買左2支羊奶潤膚霜同2盒尿布疹膏，兩樣都啱大人小孩用，盛惠$200。

另外就買詩思樂乾棉同濕棉，分別平均$22.7 / 包、$75/ 120片，包送貨到宅。

仲有pigeon 濕紙巾 $120/12包。

仲有食物剪 $10、bb牙刷$15 和 $29、紙包飲品盒$14、香蕉牙刷$32、牙膠奶咀$29/2個

至於下面呢兩張相，係我最精選今次bb展的禮物，all of them are free!!!!!!

左上 dha 魚油丸 30粒裝、右上雪印送bb車涼蓆

左下skip hop水樽、右下babo botanicals body wash / 防晒 ，巴哈急救靈

左上li l goat 羊奶皂、右上洗奶瓶刷

下  各款濕乾紙巾 (右下角果包好似紙巾的東西，打開係乾棉黎，好便攜)

買完晒嘢已經大約3點半，諗住報美贊臣個講座，要到5點半果場先有位，都好，可以休息一下。去左詢問處打左個印，一陣可以再進場。

聽完講座真係獲益良多，原來咁hard sell 臍帶血真係只係有錢人的玩意，又一次證明有錢有病醫。因為醫生講者話，而家紅十字會都有臍帶血庫，按指示先會比病人用。大部分的政府醫院係唔會用臍帶血黎救人，亦即係話，而家大家買果個兩萬蚊package 儲臍帶血，touck wood 唔好彩要用到的話，你只可以搵一間願意幫你用臍帶血的私立醫院，而家要果間醫院的醫生信任由你提供的臍帶血先得。又即係話，政府醫院唔會幫你用你留起o既臍帶血黎救你的家人。所以結論係，留黎用唔到，連保障都冇，所以呢筆錢慳返。

講座後拿的的東西更是精彩，首先有一個哺乳枕，好開心，我真係好需要呢樣嘢，其他就係唔同類型的sample。

仲有的係有2張門票送返比你，等你可以入場繼續行。

完場時大約七點，我入返場(蓋了印可以再進場)，在hea著看coupon book ，有位女士問我係咪排緊隊。原來我行左喺田園香個booth的位置。我問果位女士呢度有咩嘢排，佢話排個手搖鈴玩具和肚圍。原來係咁，我又排埋一份，一陣就換到了。

最後，真係最後，行多一個圈就離開了。

後記：

今日第二次去，感覺輕鬆左，一來人少啲，二來有啲目標都好清晰。例如我放棄左唔買一個蒸奶樽煲、唔join 臍帶血package、買左需要的物品等等。當然有啲仲好心動好想買，例如訂同珍豬腳薑、訂滴雞精等等。不過呢啲都急唔黎。

另外，其實場內都有好多大陸同胞或者係台胞的人士，可能佢地都係懷住為bb添置東西的心情，所以大家都比較有秩序同有禮貌。當然，呢兩日無論邊個都好似水貨客咁樣，一車一車咁車啲嘢走，亦有蹲喺度執行李的情況，甚至坐地上。但係真係冇旅遊區果種自由行情況。大部分人都係好有秩序咁排隊，甚至乎有啲冇香港聯絡電話的同胞排到佢冇得玩，都冇乜發脾氣的情況，亦完全冇爭先恐後的問題，所以會場都係玩得開心的。

此外，我強烈地覺得如果你老公或陪人，係一個超級唔慳家或唔志在錢的人，甚或討厭排隊的話，不如自己一個人去好過了，因為睇佢地啲面口都幾難睇。我在會場都會見到有啲陪人尤其長輩會喺到抱怨「排咁耐」、「有冇咁誇張呀」、「啲禮物有寶咩」的聲音。如果你身為一個好想繼續等的人，真係會好無引。鬼唔知排隊好累好花時間咩，但係我參與呀嗎﹗仲有的係，如果你咁啱遇到朋友，又或者約朋友一起去，如果大家的小孩年紀不同，就不必要一起行，因為大家的需要不同，結果會花多一倍時間黎陪她買東西，她又花一倍時間陪你買，這樣係唔划算的﹗

最後的最後：

最後我咪講座拎到2張門票的，我放左上網賣。我以20蚊2張賣出，未到十時半，就有人表示想買了，翌日早上我便和她交收，希望她也玩得好開心。 結果，我第二日入場的門票實際支出只係10蚊2張，令我覺得自己好幸運，亦好回本。

除左上次個現成高鐵餐，我再搵左一個補血湯水，完全無難道，又易煲又好飲。

身為孕媽媽，如果打算去bb展大肆購物或玩，首要條件係要夠壯健同埋有人陪。因為一個人去實在太危險，場內咁多人，萬一唔舒服或者比人撞親都唔好啦﹗

今年的bb展喺2017年8月4日至7日舉行，地點一如以往係灣仔會展，住喺柴灣的我，覺得自己享有左地點的便利，結果，一去就去左兩日。

我本身係一個都幾唔鍾意迫的人，不過每年書展我都會去，因為可以買到自己鍾意o既書，或者買到一啲一直好想買又冇減價的書。

今年終於要做媽媽，所以都去bb 展見識下。

抱住見識下的心情，我去到竟然有意想不到的驚喜，而且滿載而歸，以下係我呢兩日所有的戰利品。

{我覺得自己都好厲害，可以拎到咁多嘢，呢度只有不多於4份1係自費購買，其他都係贈品}

因為咁好戰績，所以我決定要寫一篇bb展孕媽媽攻略。

我係8月5日去bb展的，門票係由oxford path 玩facebook 遊戲換返來的，有兩張，和大大一齊去。以下係我今次攻略的要點：

事前準備 - 

- 事前報講座，抽獎，期望拿到免費門票

- 報名媽媽會的講座，完場可能會派發門票

- 雖然會展場內有野食，但係冇位坐，孕媽媽中場外出午飯或休息要去詢問處蓋印，可再進場

- 必須買Coupon book，裡面會有好多購物優惠券、遊戲券、試用品換領券

- Print 定兩款個人資料label，一款係只有英文名，電郵，電話；另一款用全名，地址，電郵，電話。第一款係比啲你唔想佢會聯絡你，但係又好想換佢份贈品嘅公司，例如幼  稚園，保險公司；另一款係一啲你真係對佢啲product 感興趣嘅公司，例如尿片商，奶粉商或同你個人喜好有關的公司。

- 手機要帶尿袋/充電器，因為啲攤位會叫你係咁like facebook，會用好多電。

- 如果唔怕樣衰，拎架有座位嘅買餸車去，一來可以拎禮品，二來排隊太累可坐下。

- 要拎一個行李箱，因為啲禮品有大有細，零零碎碎，雖則有好多特大環保袋比你，但都好重、好容易撞到啲孕媽媽。

- 要帶定懷孕證明，尤其喺頭五個月，因為唔見肚，啲攤位職員辨識唔係你係咪孕媽媽，有證明方便職員check 。(真係有啲媽媽唔知渾水摸魚定係真係冇帶證明又唔顯肚，結果參加唔到一啲攤位活動而發脾氣或口角，無謂啦﹗)

場內攻略 - 

- 入到場要花些少時間睇一睇個Coupon   book ，睇下邊啲禮品自己想要，然後就排果份禮品。首先係排左大公司先，例如今次我最想要雪印送嘅bb 車蓆。最好你有兩個人，放低老公喺度排隊，然後再去一啲細公司嘅攤位換啲有限量又有價值嘅禮品。今次我就喺佢排緊隊果一個鐘入面，拎埋佢本coupon book 換左手工皂、welenda 尿疹膏sample。換到咁上下時間就返去雪印玩遊戲，好省時間。

- 續上項，到老公排到咁上下，你去replace佢玩遊戲(都玩十至十五分鐘)，佢就可以拎住兩本coupon book 去換禮物，又拎左一堆口水肩、紗巾等。

- 有部分攤位要攞籌再在指定時間換禮品，又有啲預先登記，所以要睇睇個coupon book，如果唔到你行到去冇得換又浪費左時間。

- 如遇攤位截龍，先詢問有冇拿籌的制度，詢問重新排隊的時間，和按現場等候人數而留下一人等候，待開隊時立即排隊。而另一人當然繼續會場博殺。 

- 在排隊時才整理袋子，每個攤位拿一下東西，便會有很多袋子，但如果停下來整理真的頗浪費時間，所以在長龍時整理最好，再順道看看單張，不用的就還給攤位或環保回收。(今次我地向攤位退回左兩罐君樂寶奶粉，因為我地未有打算比bb飲奶粉，拎住太重，所以就退回攤位)

- 換禮品要精明，有啲攤位會送啲好求其的禮品，例如原子筆，1ml 潤膚膏sample ，迷你相架果啲，呢啲就唔好浪費時間或浪費你嘅個人資料，索性唔好換。要換就換啲有價值同用得著嘅嘢，例如嬰兒用品，媽媽用品，品牌起碼有一次用量嘅sample 等。當然，最好就好似啲大品牌奶粉商送出保溫杯，涼蓆，dha 丸，包被等等。

- 買嘢要貨比三家，有時bb 展有好多嘢特價，但係例如乾濕棉、濕紙巾等，喺bb 展未必最平，最多只可能係包送貨或者平均平幾毫至一幾蚊，咁又何必一次過買幾箱喺屋企呢。

- 熱情Exchange。 有時我地會拿到一啲禮品可能未必需要，或者果張coupon 你用唔著，可以嘗試同附近啲媽媽交換或贈送，咁樣就可以各取所需。例如你兩人去玩攤位，換了兩張一模一樣的吹氣沙發，別人同樣換了兩個同款的水壺，剛好大家交換一下，就可以有兩款了。在會場我就遇到一位趕著離場的媽媽，她將自己的coupon都給我了，我又換到更多禮品。又譬如有一位同胞問我在哪可以拿到特大環保袋，我二話不說給她一個，因為自己也已經有五六個了，分享也很好。

後記：

- bb展要去玩兩日，除左貪心貪玩之，第一日去換禮物，本coupon book 有成四百頁，當你換四分一，都要換一百次。然後仲有啲攤位要排隊，所以第一日只可以做呢啲。第二日就係要換返或再換多次自己要ｏ既嘢，同埋認真睇下有冇嘢要買，同埋認識下新product。

- 我今次遇到的問題就係有啲嘢唔知買唔買到，例如高溫消毒煲、參加臍帶血庫等等，都係好重要驅使我去多一次。其次就係我真好想聽美贊臣果個媽媽講座，題目就係關於基因test 、臍帶血、敏感，仲有果個我好想要o既哺乳枕，所以我決定再去一次。

首先，我都知道唔係人人都接受用二手貨。有啲人話尤其BB用啲嘢，一定要最好。

不過，老實講，BB用品有好多時都係好似扑傻瓜咁，你乜都買黎比BB試，睇下BB鐘意邊樣。又或者你咩類型都買，睇下邊樣先係啱自己用。

高溫消毒煲係我考慮左好耐先買，首先，古時阿媽都係用水烚啲奶樽，完全有電子嘢用，當然係非常辛苦，但係又未至於辛苦死人，所以我當初都係諗住烚奶樽就算。

後來諗諗下，屋企咁鬼多蟑螂，我烚完都唔知放邊好，所以就買左個電子乾碗機，都係二手的，$80蚊，原先的主人因為覺得佢太細而出讓，真係有九成新。

我試左乾碗同用UV消毒，覺得都唔錯，打算之後烚完奶樽就放入去吹乾消毒。

經過左BB展後，有好多朋友都話其實烚奶樽個煲要全新，過程亦要有人睇住火，小心痴住個煲底，一個不留神，連煲連奶樽痴埋一起，咁就係咁先。

而且加上我覺得第時放工反黎煮飯，仲要煮埋幾個奶樽，真係好難攪喎，所以的起心肝再睇高溫消毒煲。

而家市面上已經有幾合一的煲，即係集暖奶、消毒、烘乾、收納於一身的消毒煲，而幾合一的價錢比分開買更平，基本上係新手必買PRODUCT。不過我已經有個消毒碗櫃，亦有暖奶器，實在唔需要幾合一。另外，我相信幾合一的東西係唔會比分開的好，以往經驗係二合一洗髮水用完都係要用護髮素；燒烤微波爐的烤焗功能亦唔及焗爐好，所以都係分開較好。

為左唔想太花費金錢，又美其名環保，所以我決定仔細睇二手市場。

奶煲黎講，最多人揀都係NUK、TT、AVENT呢三幾個牌子，尤其TT、AVENT以大同冇多餘間格而得到好多媽媽垂青，當然，二手市場就好多人出售呢三個牌子，仲有其他名氣冇咁大但又好實用的都有，二手價錢大約$50至$800不等。而我就揀左FISHER PRICE

介紹返個FISHER PRICE 高溫消毒煲

FISHER PRICE係一個細細個就識的牌子，因為佢啲玩具真係賣到成行成市，而奶煲呢樣嘢，我諗佢唔係最專。

今次揀佢的原因有以下幾個

1. 我自己本身對FISHER PRICE呢個BRAND情有獨鍾，因為我曾經喺玩具反斗城打工，負責BB用品，所以同FISHER PRICE好有感情。

2. 佢原本的主人用左廿次都冇，個煲好新淨，冇發黃，原裝配件、說明書、盒子都齊晒。

3. 二手價$100，同類型二手貨唔算貴，就算真係唔好用，要黎蒸下手巾都可以。

4. 其實呢個最重要，呢個煲好夠大，一次可以蒸7個奶樽，上層可以蒸奶咀和配件，全程九分鐘攪掂，快捷。另外內籠都係冇多餘間格，第時啲碗仔餐具都可以放落去蒸杲

5. 佢原本的主人住喺我對面個屋苑，行過去交收唔洗5分鐘。

結果，我就係買左佢返黎。

今日我試左機黎，我之前飲住滴雞精啲玻璃樽仔放入去蒸，過程好快，好利落，落水開機，完全關機，得左，真係冇挑剔。

PS：我買呢個煲前，同時見到幾個都好心儀的二手貨，都係覺得呢個比較好。同賣家約交收，初時佢好積極，日子都約左，但係差在未CONFIRM時間。突然距離交收兩三日，佢消失左，留言幾次比佢都冇回覆，我仲好擔心佢唔賣比我。因為剛好係BB展，如果佢又唔賣，我又睇唔啱第二個二手貨，我就要趁BB展買減價貨。忐忑左好耐，去到星期日，我忍唔住，拎左個靈擺黎問，到底果位賣家會唔會賣比我，結果靈擺話會，所以星期日我去BB展睇完一輪都冇落注，我心諗，如果靈擺唔準，我唯有星期一BB展LAST DAY再入場買個煲。結果，賣家星期日晚好夜終於覆左我，佢冇留意留言，佢以為約實左我星期一了，不過佢忘記左未約我時間。好在，最後都交收成功﹗真係要感謝個靈擺比左一個答案我﹗等我唔好咁慌，冷靜啲唔好胡亂消費﹗

上兩周看醫生的時候說起頭暈頭痛的問題，還擔心會不會是妊娠糖尿病或毒血症的問題，所以醫生幫我抽了血化驗和做心電圖。

翌日診所護士留言給我，叫我明天回去，因為醫生要儘快見我。

嚇得我半死，以為自己發生什麼問題，又擔心會不會有妊娠期的疾病，擔心了一整天。

到達診所，遲到了一些，但還是被安排為第一個籌號的病人，令我更加擔心。

見到醫生，醫生說原來我是貧血，她說3月份在醫院的驗血其實已是邊緣人士，但剛剛這次更是新低。所以醫生說：

你要食鐵丸﹗

鐵丸，係一種冇媽媽想食補充品，因為食鐵丸最大的問題係便秘，便秘除左痾唔到，夾硬痾只會生痔瘡，所以真冇人願意食。

但係，唔夠血又點算好呢？立即又上網又睇書，睇下點樣補鐵。

原來食物的鐵質都有分血紅鐵和非血紅鐵，簡單講

血紅鐵係黎自動物內臟、肉類、海產的鐵；

非血紅鐵係黎自蔬果類的鐵。

而人體最易吸收的係血紅鐵。

睇完一大堆資料，發現我地成日話食多啲菠菜可以補鐵，但係呢啲鐵人體相對冇咁易吸收；又成日話食返多啲牛肉，但係牛肉原來含鐵又唔係最高。

鮮為人知的，竟然係要食 蜆 蜆 蜆 蜆 蜆﹗(每百克3.8mg). 食蜆最好係罐頭果種，係最鐵o既食物黎﹗(每百克高達37.8mg)

真係令人驚喜，其次就係豬肝等內臟。(每百克平均2.x mg)

問題又來了，罐頭蜆到底邊度先有得賣？唔知囉﹗

為左血紅鐵，我決定去超市睇下。

去左百佳同惠康，大家不約而同地都只有泛亞牌煙燻蜆肉，已無其他選擇。

買罐返黎試下先，一罐扣除啲汁唔知有冇100克，不過都冇所謂，因為我本身都唔食內臟，牛肉又少食，所以選擇唔多，就食啲蜆啦！

除左蜆之外，我仲食左排行榜上都幾高位置嘅沙甸魚(每百克約2.4mg)同黑芝麻 (每百克24.5mg) 。

沙甸魚都係果幾個品牌，只係選下唔同口味令自己冇咁悶，而芝麻糊我就揀左由細食到大嘅多多，我自己仲加左馬玉山黑豆粉，夠補血啦掛。

今日睇資料，原來紫菜都好勁鐵，每百克有成90mg，呢個抵食啊，再食啲紫菜先！

越接近懷孕後期越係緊張，因為身體需要嘅鐵質由初期嘅每天8mg 上升至中期21mg，食得多又唔知吸收到幾多。

黎緊九月又去覆診睇貧血，希望會有好轉啦！

傳統大肚媽媽生產後都會飲炒米茶，近年都流行將幾種米混合果皮一齊飲，而我自己就會選擇白米、糙米、黑米呢三款米。

自從有BB之後，我一直都好擔心會生出好多妊娠紋。最重要原因係因為我之前肥過又瘦過，個CALL機位已經生左唔少橙皮紋，而家知道個肚將超巨大，所以真係好擔心會成肚都係紋。

我第一支買的係PALMERS，呢款應該係香港最普遍的妊娠紋膏，無論係暗瘡、火山口、妊娠紋等等，我覺得香港人真係乜乸(疤)都搵佢黎搽下，好處就係夠平，又大大支。有冇效我就唔知啦，我只係知道PALMERS真係香得太誇張，對於我有鼻敏感真係受唔住， 所以用左一兩次就冇再用啦？

第二支係我自己每天MIX的按摩油，成份有JOJOBA OIL、ROSEHIP OIL、VITAMIN E OIL、摩洛哥堅果油，KEEP住用左4個月左右，冇明顯生多左紋，都不錯﹗只係用晒了，補給的價錢比買支妊娠紋油仲貴，所以唯有買支新。

第三支係BIO OIL， 都係廣告效應而買，網上買大約$130。呢支冇我自制果支咁好推，但係味道比較清新，亦覺得夠濕潤。不過同時睇張嘉兒個VLOG，她推介CLARINS支去紋膏，配合油一齊用好WORK所以二話不說，買埋佢一齊用。(雖然好貴，但同時因為我個肚開始長大啦，要再比心機搽多啲﹗)

SO FAR到現在七個月，個肚仔冇大量生紋，只係有啲因為頭果四個月暴肥而生出左啲紋，但全部都好淺色。

前幾日好開心，有個同事話佢家人有支貨版BIO OIL，轉贈左比我，我又可以開懷用啦﹗ 

近來台灣嘅滴雞精喺香港非常流行，無論女星定blogger 都好吹捧，標榜懷孕期定坐月補身一流。

可惜，最出名嘅田原香要九百蚊一盒，得果廿包，好親民嘅金牌圑購價都二百蚊一盒得十包。結果，我又好克儉咁自制。

 首先，搵隻natural啲嘅雞喺香港地都好困難下，因為平日我地已經比較難買到啲活雞，如要無激素更加係難上加難。

我睇左好多店，本來想買綠色包裝果隻organic急凍雞，但要180蚊，好貴啫。然後再去北角賣外國扒果啲店，有一款西班牙急凍雞，冇激素同抗生素，不過唔係organic要120蚊。最後，我無意中喺x康超市，竟然見到danpo無激素雞，而且解左凍，只係88蚊。解埋凍，買得過呀！

 結果，我就用左我老豆擺左廿年果個燉盅，加半隻雞，紅棗兩粒、黑棗一粒、黃芪半片，燉左三小時。

 完成後嘅成品有225ML左右，大約有三樽半白乜氏雞精的分量。至於味道，就係好豐富的藥膳雞湯。最重要的係三個小時都唔洗睇火，雖然未至於可以走出街唔理佢，但係個燉盎係唔會滾瀉，亦唔會產生好大的水蒸氣，所以室溫亦唔會提高。

呢個成品真係有好乜多油，攪左我好耐去清理啲油。第二輪再整另外半隻雞時，我決定，切走左層雞皮先，真係少左好多油，易處理好多。

另外滴完雞汁啲雞肉已經冇乜味，食又唔係掉又唔係，最後整左涼拌芥末雞絲，不過，都係冇晒雞味了。

我仲用左白X氏雞精樽黎裝住，半隻雞大約有3.5瓶。第二輪得返3瓶，因為我唔小心倒瀉左一啲。

後記：我考慮緊仲整唔整呢個滴雞汁，因為我計算過，而家$88HKD 可以買到一隻雞，少量藥材唔計錢，然後滴出六瓶左右，平均都$15一樽。但係而家金牌大師圑購平均約$20一包仔，分量一樣。就咁睇好似自己整要花心機洗雞、斬雞(而家個肚越黎越大，越難用力)、同埋等3個小時再洗嘢，存放好，好似又有啲勞民傷財。之後我用左靈擺黎問，佢的回應係產前自制、產後買金牌大師。我仔細問到買田園香、皇朝或金牌大師，衪選了金牌大師，唔知因為衪知我節儉，還是我心中已預設了價錢這個考慮因素，所以祂指出了金牌呢﹗

今日係距離BB出世仲有一百天，佢係囡囡黎，係我地第一個孩子。

仲有三個多月，心裡都幾緊張，因為我地都係外表成熟又係HELPING PROFESSIONAL，但係個心都係一個要人照顧的大細路。結左婚都五六年，生活都仲係靠家人照顧住，而家竟然要照＠一個BB女，真係有啲壓力，尤其我地兩個都係懶到出汁的懶鬼。

李麗珊曾經話過，要養育一個小朋友要四百萬，而呢個講法怕且已經係十年前．跟據而家物價通漲，我諗呢個數起碼都係五百萬。到底，我地要點先可以將囡囡讓大成人呢？真係要黎個克儉育兒孕記先得。

ANYWAY，BB好快就要出世，我希望可以透過呢個BLOG，記錄下開心和煩惱的事。